Phili 2 | KMG | STEP | Ŋoŋerao Kristore erâ sawaŋ qaqac me maŋjauŋko muketeŋ, me Mârohec šâšâfic, me miriŋ â buuruc, wiac i sasawa fokacko

Philippians 2

Maŋ mocjaja erâ jauŋ babac ezo

1 Ŋoŋerao Kristore erâ sawaŋ qaqac me maŋjauŋko muketeŋ, me Mârohec šâšâfic, me miriŋ â buuruc, wiac i sasawa fokacko 2 bubiaŋ-nane ferâ foocte mamanasu-ŋeŋic qâturenšepieŋ, erâ maŋzi šâšâfic ehuc mocjaha efârerâ wiac irecteaŋ henširiŋnehuc junšepieŋ. 3 Ŋoŋe hehefaricko â sahac mumuteŋko wiac mi enšepieŋ, moc e jahacne maŋ bawahahuc âgofâcne jaŋere maname fezejec. 4 Erâ moc e jahacne wiac embiaŋkeocte sawa mâcne, âgofâcne jaŋere fua biaŋ eocte mâmâc manasuzejec.

Jesuzi hata bânie-nârewec ijaha âtezo

5 Kristo Jesure maŋ mamanasu fowec, iŋuc jaha ŋoŋerezi fozejec. 6 E Anutu juju juweczi ine, Anuture sâcko juekopac weniŋuc behepemu, iŋuc muhuc mi sakarewec. 7 Aricne, e juju-ticne hetararâ kiŋaŋ qaqa hawari rohuc ŋic iŋucne fuawec, â eebapa-ticne honepie ŋic nâŋâcne sâc ewec. 8 E wahakicne erâ juhuc micrereŋte hata âte raku hâmoc maickewec, maripoŋko hâmoc hâcne. 9 Iŋuc ewecte Anutuzi bafehuc fekicne sâko âkendâŋnewec. Âkendâŋnerâ šâŋe biŋe-ticne fuŋmoc izi haŋ bahuc ŋic šâŋe biŋe getâcke-fâreocte mucnewec. 10 Eme sambâŋko â mâreŋko â mâreŋ jujuwicnao jueŋgopieŋ jaŋe šeŋgoma Jesure šâŋe muhuc dieŋzi hecnenšepieŋ 11 â micne mic sâc Jesu Kristo e Wofuŋ jukac iŋuc musereckenšepieŋ. Eme mumuteŋ izi Anutu Mamacte biŋe ezejec.

Biaŋke-hâmonaŋte fotarienšepeneŋ

12 Jorocfâc-nane, ŋoŋe dameŋ sâc micrereŋ eeŋgopieŋ, ŋoŋehec juhape sawa mâcne, taicko juhape wâc ejâmbâŋkeeŋgopieŋ, irec bâbâpiaŋ-ŋeŋicte fârine bâfuaniŋte mezac-ŋopaha fotac qatarienšepieŋ. 13 Anutu e jahac hâcne, honec-ŋopame biaŋkeocte aafecke mecne fârine bâbâfua mecne irec tâpiri ŋareekac. 14 Ŋoŋe wiac sasawa kâroŋ â maŋguru tâmiric enšepieŋ. 15 Erâ bahacmâc â maŋtaniŋ junšepieŋ, ehuc ŋicguru bac bâŋoricne â qaqaharicne jaŋere dapâc ŋondeŋko Anuture naru motecfâc maŋɋaɋac erâ juhuc bâpiŋ iŋucne tamaenšepieŋ. 16 Tamaehuc jujure dâŋ paŋnea bajunšepieŋ. Iŋuc epie juku Kristo fifisi dameŋ-ticnao, šâic mi mana-bipiepo â gie mi bâipiepo, irec fuŋne taniŋkeme šeri bubiaŋ manazepac. 17 No mamanasiŋ-ŋeŋic Anutu taha bacnehuc sahac-nane due bapemuo sifu irec šeri ehuc ŋoŋehec bubiaŋ manapemu. 18 Á ŋoŋe iŋuc jaha šeri ehuc nohec bubiaŋ mananšepieŋ.

Timoteore dâŋ

19 Wofuŋ Jesuzi maname sâckeme Timoteo biac ŋoŋerao sorepe fâocte mukopac. Eme ŋoŋere dâŋ biŋe moc risie wareme manarâ bunane mâteŋkezejec. 20 Ŋic e iŋucne moc mi junareŋgopieŋ, eki jâmbomac ŋoŋere manoniehuc maŋticnezi dopec-ŋopaocmu. 21 Ŋic gâcne jaŋe jaŋacnere sawa manasuhuc Jesu Kristo gie-ticnere mi mueŋgopieŋ. 22 Timoteo ine juju-ticnere fuŋne manaeŋgopieŋ, ŋokâzi mamac-ticne bafickeekac iŋuc jaha no Biŋebiaŋte giere baficnuekac. 23 Eme no nahacnao wiac iŋuc me iŋuc fuaocmu i mana-hâmorâ e hâcne biac sorepe fâocmu. 24 Erâ Wofuŋzi mana-nareme no nahac wâc mi šoraha ŋoŋerao fâpemu, iŋuc manakopac.

Epafodito ere dâŋ

25 No wiac basahuc juhape ŋoŋe Epafodito sorepie ware dope hutuŋ enarewec, ehuc qomâ-nane â babafic-nane â momori âgo-nane juekac, e sifu bârisie-ŋarezo mukopac. 26 E huc bame biŋene manambiŋ, eme ere manabâc enšipiŋte ŋoŋere maŋhâhâŋ ecnekac. 27 E huc ŋemâcne bame hâmozo ewec. Anutuzi ine ehâmocnewec, erâ e sawa mâcne, norao busâqoczi busâqoc fuazacte no mâmâc ehâmo-narewec. 28 Ŋoŋe honerâ buŋeŋic biaŋkeocte â no iŋuc jaha manabâc tâmiric jupemurâ e mi sakarehuc šiŋuczia râepe fakac. 29 Irec fâme bubiaŋ manacnehuc Wofuŋte erâ âgo ecnenšepieŋ. Ŋoŋe ŋic iŋucne hâcne sâsec-jopanšepieŋ. 30 E Kristore giere erâ hâmozo ewec. Ŋoŋere okacne kiŋaŋ qanareocte sahac-ticne qaisockewec.